انا مين!

ملحوظه غريبه مؤخرا لاحظت انى مش عارفه انا مين معدش عندى الصوره الذاتيه حسه بنفسى شىء هلامى ملهوش الى ملامح يمكن ملمح وحيد اللى عارفاه هو الحزن الدفين ليه مش عارفه ليه حتى وانا بضحك فى حته جوايا مليانه الم مش عارفه ممكن نتيجة احساسى السلبى مؤخرا بقيت اكثر مرحا هههههههه مش فاهمين حاجه انا اقولكوا انا اه بهزر وبقلب الدنيا ده مؤخرا بس وغالبا بيكون على النت تقديرى للموقف انه هروب مش اكتر.... المشكله بقى سالت نفسى انا بهرب من ايه مفتكرتش بس الحقيقه انى بهرب من نفسى من خوفى
ليه بخاف من الناس ليه مش بتكلم مع حد معرفهوش غير بعد فتره من الزمن ليه حتى الناس اللى بعرفهم بوقفهم عند حد معين مخلهيمش يقربوا منى اكتر منه ليه لو حسيت انى ارتحت لحد قوى وان الانسان ده كويس معايا جدا بهرب وبعمل اى حاجه علشان ميبقاش فى مجال للكلام
يا ترى انا بهرب من الحياه ! الحياه مش اكل وشرب ونوم الحياه انى احس بقيمت نفسى ووقتى واستمتع بكل لحظه واحس انى بعمل حاجه مفيده لو مش مفيده لحد على الاقل مفيده ليا.......صراحة انا لو اختفيت من الدنيا فجأه مش هفرق كتير نفسى اعمل فرق ولو فى حياة شخص واحد بس وعلشان اعمل فرق لازم احب نفسى الاول
من كام يوم صديقه قالت لى انى مش مديه لنفسى فرصه اعرف انا عاوزه ايه ومش مديه لنفسى فرصه انى احبها عندك حق بس صدقينى انا لما بفكر فشعورى بنفسى بلاقى نفسى بدمع من غير سبب وفعلا انا عايشه الدنيا كده زى ما تيجى تيجى

نفسى اخرج من الضياع اللى انا فيه يارب ساعدنى انت العالم بحالى وقادر تصلحلى الاحوال يارب اصلح لى شانى كله واكتب لنا الخير حيث كان.

متفضل مين

باركلى باركيلى اتخطبت وهتجوز كمان يومين
مبروك مبروك يا ترى مين
مش هتصدقى ده محمد اخو نسرين
وده شافك فين
شافنى من يومين ولبسنا الدبلتين
واو والشقه فين
يا بنتى شقة مين احنا هنكتب الكتاب وتننا طيرين
ايه ده هتقضوا شهر العسل فين--- عسل مين احنا فنفضل بره عايشين
هتسبى مصر هو انتى مسمعتيش اغنية شرين
فكك هو احنا هنا عايشين ده الدنيا هناك جميله والناس بره مبسوطين
الا صحيح هتسافروا فين --- السعوديه--- تصدقوا انتوا خايبين كنتى رحتى قطر او الشارقه او حتى عين
ياختى هو احنا طايلين
هاتى موبيايلك ابعتلك صورتين
معلش اصل انا موبايلى جيل قديم
ولا تزعلى نفسك هديلك بتاعى اصلى هشترى واحد بخطين
الله يرحم لما كنا معفنين ونتمنى ان شالله شبشب بيرن رنتين
خلاص خلاص تعالى هنا شوفى عريسى ---هو فين
الحلو ده ابو غمازتين
ما شاء الله ولا ساموزين
شيفاكى فرحانه ولا كانك هتسيبى صحابك الانتيم
صحاب مين سلمى ورحاب وساره سافروا من شهرين
منى ومروه ورشا اهم لسه كاتبين وهيسافروا يوم عشرين
حسى بقى يا زفتت الطين هتوحشينى-- بعدكمش هعرف اكلم مين
انتى مكبرها على ايه احنا بقينا فالقرن الواحد وعشرين
ديتها كاميرا ومايك وسماعتين
طب غورى من وشى قبل مكسر عليكى قلتين

انا رايحه ادور على اسبرين
سؤال والنبى حد يجاوبنى عليه هومين المتغرب السافروا ولا اللى فضلوا قاعدين

حبك بورص

ده كانت الاجابه المنطقيه الوحيده بالنسبالى لو حد قالى بحبك يمكن علشان كده محدش تجرأ وقالها. طول عمرى اسمع بابا او ماما بيقولوا بلا حب بلا كلام فارغ وانا بقى اخدتها مبدأ ده هبل ولعب عيال ده كان لحد وقت قريب جدا .
طيب ايه اللى غيرنى بصراحه اللى غيرنى هو ان صديقه ليا عاشت قصة حب مستعصيه فالاول انا عملت عبيطه ومحاولتش اسأل. الحمد لله انا مش من النوع اللى بيحشر نفسه فحياة الناس الخاصه بس معرفش ليه هى اختارتنى انا بالذات علشان تشركنى معاها فموضوعها تفتكروا كان رد فعلى ايه
انا كنت متوقعه من نفسى انى اشجب وادين ولكن اللى حصل عكس كده خالص لاقيتنى متفهمه وتاثرت جدا لدرجة انى كنت ومازلت مستغربه نفسى يمكن لانى محتاجه احس الاحاسيس ده برده انا بنى ادمه ورغم ان حكايت صحبتى بأت بالفشل نفسى اتفتحت على الحب وبقيت بشوفه شىء مشروع طبعا فى نطاق معين واتعلمت
اتعلمت ان مشاعرنا ده حاجه جميله وغاليه اه منكبتهاش جوانا ومنديهاش لاى حد عرفت امتى اقول حبك برص وامتى اقول وانا كمان

سامحينى مش عارفه افرح معاكى

صحاب كلنا عندنا صحاب بس صحبتى ساره ده حاجه سبشيل ده الصاحبه اللى فالحته الشمال زى مبيقولوا
لو فضلت احكى عليها بقى مش خلص هى انسانه عاديه اكيد بالنسبه ليا حاجه تانيه تقدروا تقولوا الوحيده اللى انا مش بحس معاها انى مهدده بالطرد من حياتها لو حتى غلطت فيها ربنا يديم المحبه
معرفش اذا كانت غلاوتى عندها زى غلاوتها عندى مش مهم المهم اننا قابلين بعض بعيوبنا بكل حاجه فينا
امبارح كلمتنى ويا سلام بقى صباح عسل انى اصحى على تلفونها اصلها مش رغايه زى ناس ههههه
قالتلى باركلى اتخطبت انا صرخت مبروك وفرحت ها يلا قولى التفاصيل قالت كتب كتابى يوم الاربع فبالى ليه الاستعجال بس
ربنا يتمم بخير كملت هى وهسافر السعوديه معاه شهرين كده على اقصى تقدر
اتصدمت مش عارفه كل اللى عارفاه ان قلبى واجعنى سألت نفسى هو متفضل مين
كل الناس سافرت واللى فضل شغال ليل نهار كانه فساقيه طيب انا لما احب اشوف حد بينى وبينه تاريخ يعرفنى قبل متجور عليا السنين
يعرف ان الوش الكئيب ده مش هوالحقيقه يعرف يشوفنى بقلبه اروح لمين
ساره سامحنى مش قادره اقسم معاكى فرحتك زى م حنا متعودين المره ده انا انانيه ممكن اصلك متعرفيش يعنى ايه تبقى فدنيا مفهاش بنى ادمين

انا بعمل هنا ايه

غريب النت ده كنت زمان لما اسمع ان النت ادمان اضحك واقول هو فى ايه يعنى على النت يخلى الناس تقعد كتير لدرجة الادمان دول اكيد ناس هايفه وفاضيه
مكنتش اعرف انى هكون فيوم من الايام من الناس ده مهو اخرت التريقه وحشه
نرجع للعنوان انا هنا بعمل ايه ؟
بكتب اكيد بس المختلف فكتابتى المره ده انى بكتب من غير مخاف من حكم الناس اللى حوليا من غير مشيل هم. اللى بحسه بقوله كده وش
الصراحه انا النهارده بالذات حسيت برغبه كبيره للكلام بس اكلم مين اخواتى كل واحد فملكوته صحابى ههههه معدش فى بينا حاجه مشتركه بعد متخرجنا كل يوم بيعدى بيكبر الفرق فتفكيرنا طيب اعمل شات جربت بس مالاخر مش جايب همه وكمان تحس فيه انك رايح تصطاد ويا صابت يا خابت وغلبا خحابت فالشات سبحان الله الناس كلها بتحب ورقيقه جدا اما قليلة الادب جدا طيب وعلى ايه بطلنا الشات
واخدت القرار انا لازماستغل وقتى ولازم اتغير تفتكروا اتغيرت اكيد الاجابه واضحه
لكن برده بحاول انى احسن من نفسى ومن استغلالى لوقتى بصراحه انا بحاول اشغل نفسى باى حاجه مش عاوزه افكر هروب اه هروب مش هقول من الواقع المرير عاوزه اهرب من نفسى ومن تفكيرى اصلى اى حاجه وحشه تحصلى لازم افضل حسه بالذنب واقول انا السبب انا السبب تفتكروا ده طبيعى
بيتهيالى كفايه رغى كده بالنسبه لاول مره اكتب مطولش عليكوا
سلام